Vor Wahrheit im Wy

Chumm mir gönnen üs no e Schluck 88er Cabernet | Liecht gschwänkt i däm
buchige Glas da entfaltet är sich umso meh | Und wenn d'Gschmacksnote alli
erklinge ersch denn darfsch dä Nektar verschlinge | Us em 88i wo alles
eifach isch gsy und me d'Wält no in Schwarzwyss hett gseh

Und de trink i uf üse Planet | Und uf jede wo ds Spiegelbild gseht | Vo sim
Rychtum i mim Trubesekret

Chum reich mir dis läärtrunkne Glas und i schänke dir nomal y | Und wenn
d'Fläsche de läärtrunken isch de git's halt no nen andere Wy | I schla vor
en alte Burgunder ds achte Goumewältwunder | Dasmal im ene steilwandige Glas
won er besser fliesst lut Theorie

U we dä läär isch de heb i mis Glas | Uf d Franzose oder zmindescht uf das |
Wo ne glingt im Burgund und Elsass

Hesch nid o no Durscht ja jitz los mir stygt da ganz plötzlech i Chopf | Wäg
mir Frou han i es Fessli verlocht im Ärdbeeribeet näbem Schopf | S'isch
Wysse wo me drinne möcht schwümme weles Glas da passt weiss i zwar nümme |
Doch wän kümmeret's scho vo itz a giesse mir doch eifach alles i glychlig
Topf

Und de stosse mir a uf e guet | Italiäner wo Wy macht mit Gluet | Ja dä
Chianti git üs Senne guets Bluet

Sisch gspässig das Fässli hett mir mi Durscht anstatt z'lösche no gnährt |
Und drum wird die letscht Fläsche sälbscht wenn's nur Chochwy isch jitze no
glährt | Und jitz wo dr Rot- und dr Wysswy uf ds Mal nur no rot oder wyss sy
| Hett sech mi Blick uf die Wält wo jitz ou wider zwöifarbig isch plötzlech
klärt

Und de schänk i mis letschte Glas y | Und suffe das so wies mues sy | Uf
d'Heimat und d'Wahrheit im Wy

 

Ufgno, gmixt und gmasteret vom Alain Andrey, freeze studio, Biel
Alli Live-Ufnahme stammen us em Café Alpin in Bern
Songs 1 und 2 vom 23.11.2006, Songs 3, 4 und 6 vom 19.10.2005,
alli andere Songs vom 15.11.2006
Text und Musig bi allne Lieder: Nils Althaus
Gitarre, Gsang, Cello, Perkussion und Gschnurr: Nils Althaus