Ändlech

Liebs Publikum, liebi Aghörigi, liebi Fründe, liebi Fans

Mir verabschieden üs hütt mitenand vom Liedermacher, Kabarettist und Schouspiler Nils Althaus. Är hett sich entschide, «Ändlech» es Ändi z'setze.

Dr Nils Althaus wird üs allne in Erinnerig blybe als bescheidene, ufgstellte, begabte und immer wider unwahrschinlech pointesichere Unterhalter.

I cha mi guet erinnere, wie alles hett agfange, damals, mit em Buchspeicheldrüessegedicht. Scho nach den erschte paar Wörter han i sofort gspürt, dass die Zyt mi ihm e tolli Zyt wird sy. Doch bi däm Programm wo sich dr Nils Althaus zuetrout hett, hett's wahrschinlech e so müesse cho, dass är irgendeinisch e Pouse het bruucht. Är hett sich zrüggzoge i d'Garderobe, und i däm schwirige Momänt hei sich vili under üs vo ihm abgwändet, und si usegange, für ne Zigarette z'rouke.

Dr Nils Althaus hett sich zwar no einisch ufgrafft, doch sini Lieder, da müesse mir ou ehrlech sy, si irgendwie nümm di glyche gsy wie ir erschte Helfti und won är «Ups i ha's scho wider gmacht» hett agstimmt, da hett's eim dünkt jitz göngi's mit ihm scho rapid bärgab.

Dr Nils Althaus hinterlat e Lücke, wo o anderi Künschtler nie wärde chönne schliesse. Alles, was mir chöi tue, isch üs a ihn z'erinnere, vo ihm z'verzelle, ihn wyterz'empfäle, sini CDs z'choufe und z'verschänke, sy Newsletter z'abonniere und ihn für privati Aläss z'bueche, o wenn mir nie wärde chönne verstah, warum mir alli sone höche Prys müesse zale.

I wünsche öich, liebs Publikum, liebi Aghörigi, Fründe und Fans, e guete Heiwäg und i bi mir sicher, dr Nils Althaus cha öich ghöre, wenn dir ganz, ganz fescht apploudieret. Guet Nacht.