Es lysligs Lied

Darf i euch bitte für ne churze Moment
Ds Rede la z'sy wenn o Flüschtere längt
Nume z'Schmunzle wenn dir ds Gröhle chöit bha
Und ds Klappere mit em Gschir z'underlah

I bitten ech drum wülls so sällte passiert
Dass niemer d'Stilli mi Lärm malträtiert
Wäm ligt hützutags no öppis ar Rue
Däm wo am lütischte schreit lost me zue

So wärde vil luti Versprächige gmacht
Di meischte dervo nid mid Vorsicht bedacht
Es dünkt mi fasch je lüter eine öppis verspricht
Desto wahrschinlecher ischs das ers bricht

Und drum singen i euch es lysligs Lied
Wo ne bescheidene Tonfall vorzieht
Eis oni Versterker und Mikrophon
Mit chlinen Ambitionen und keim grosse Ton

I weiss es wird keis gwaltigs Echo druf gä
Für das müesst me äbe e Lutsprächer nä
Aber ehrlech gseit isch es mir lieber e so
Denn die wo's wei ghöre verstö mi gloub scho

Und drum singen i euch es lysligs Lied
Wo ne bescheidene Tonfall vorzieht
Eis oni Versterker und Mikrophon
Mit chlinen Ambitionen und keim grosse Ton

Und drum singen i euch
Es lysligs Lied
Denn vo däm lääre Gschrei
Bin i langsam e chli müed
Und o wenn me sich dr Inhalt cha schänke
Und's nid so rein tönt wies sett sy
So schänken i doch wenigschtens
Reine Wy y
So schänken i doch wenigschtens
Reine Wy y

Ufgno, gmixt und gmasteret vom Alain Andrey, freeze studio, Biel
Alli Live-Ufnahme stammen us em Café Alpin in Bern
Songs 1 und 2 vom 23.11.2006, Songs 3, 4 und 6 vom 19.10.2005,
alli andere Songs vom 15.11.2006
Text und Musig bi allne Lieder: Nils Althaus
Gitarre, Gsang, Cello, Perkussion und Gschnurr: Nils Althaus