Vollchornbrötliblues

I bi ne Teig uf mim Chüssi so fuul und schlapp
No nes Bitzeli fuler und de fulet mir öppis ab
Es isch Sunntigmorge das heisst irgendwenn vor langer, langer, sehr sehr langer Zyt mal gsy
Und i brüchti d'Power vom ne Vollchornbrötli
Doch für e Wäg bis zur Chuchi fählt mir d'Energie

Und sälbscht wenn i mögt ufsta und es Brötli gässe hätt
Müesst i für d'Verdouig ja de glych zrügg i ds Bett
Und de wär ds Resultat vo der ganze Strategie
nume en nutzlose Chraftverschleiss gsy
Und für das fählt mir bekanntlech e chly d'Energie

Nei I gloub es gitt kei Uswäg us myr bittere bittere Not
I cha grüblen und mache i ha hie eifach ke Brot
Es sei denn dass ds Brötli mi Notlag versteit
Und sich nid ganz bache näb mi Teigchlumpe leit
Doch für e Wäg bis zur Chuchi nei äbe wie scho gseit

Nei i dänke die Schlaffheit die bezwing i hütt ni
Und je meh dass i dänke desto schlaffer wird i
Drum lan ig o ds Dänke gloub gschyder la sy
Träije mi nomau um und döse no chly
Und für di letscht Träijig längt ou no knapp d'Energie